Eduki publikatzailea

Atzealdea

UROLA GARAIAN ARGI DUGU

Urola Garaiaren Energia Planaren baitan kokatzen den kanpaina, eskualdeko bizilagunei zuzenduta, eta elektrizitate kontsumoa murriztea zein herritarren zaurgarritasun energetikoa ekiditea helburu duena.

2018·10·15


UGGASA, Urola Garaiko Garapen Agentzia, eskualdeko Udalekin elkarlanean, “Argi Dugu” ekimena plazaratzen du. Ekimen hau eskualdeko biztanleei dago zuzenduta eta etxebizitzetan egiten den energia kontsumoaren gakoak hobeto ezagutzea du helburu, baita zaurgarritasun energetikoaren errealitatea ezagutzea eta berau ekiditeko neurriak hartzea. Urola Garaiak urteak daramatza eskualdearen energia eredu berri baten alde lan egiten. Horretarako Plan zehatz bat egin zen zeinetan eskualdeko eragile eta herritar ezberdinek parte hartu zuten. Planak hainbat erronka jasotzen ditu, horien artean eraginkortasuna eta aurrezkian oinarritutako kultura energetiko berria bultzatzea eta ahultasun energetikoa murriztea daudelarik. Orain abian jartzen den ekimen honek ildo horietan aurrerapausoak ematen eta eskualdeko eredu energetiko berriranzko bidea jarraitzen lagunduko du.

Zergatik Argi Dugu?
“Argi Dugu” izenarekin ekimenak berak batzen dituen bi kontzeptu uztartu nahi izan dira: batetik, energia kontsumo arduratsua eta adimentsua egiteko zalantzarik ez dituzten etxebizitzak eta, bestetik, egoera larrian egon daitezkeen etxe argiztatuak.

Argi Dugu izateak zer suposatzen du?
Ekimen honetan parte hartu nahi duten etxeei, lehenik eta behin, bisita energetiko bat egingo zaie, hau da, pertsona bat euren etxera joango da eta haiekin batera zer nolako energia kontsumoa duten aztertuko da. Informazio horretan oinarrituta, energia plan pertsonalizatu bat egingo zaie, non kontsumoa murrizteko eta eraginkorragoa egiteko ekintzen proposamen sorta bat proposatuko zaien. Lau hilabete emango dira ekintza horiek martxan jartzeko eta, denbora horretan zehar, hainbat aholku eta jardunbide on azalduko zaizkie. Azkenik, lau hilabete ondoren, etxebizitza bakoitzaren emaitzak aztertuko dira eta etxe bakoitzak bere emaitzak azaltzen dituen txosten bat jasoko du.

Nola egin Argi Dugu ekimenaren parte izateko?

Ekimen honetan parte hartzea erraza da eta bide ezberdinak ireki dira izena eman ahal izateko: 943 72 58 29 telefonora deituz (UGGASAra), ugargidugu@gmail.com posta elektronikora idatziz ala norberaren udaletxera hurbilduz.

Izena emateko epea urriaren 26ean amaituko da. Ekimen hau Foru Aldundiaren laguntzarekin burutuko da

OHARRA: ekimenerako kontsumo datuen jasoketa on-line plataforma batean oinarrituko denez, ezinbestekoa da posta elektroniko eta interneterako konexioa izatea.