Eduki publikatzailea

ASTELEHENEAN JAI-ALAI KALEA PEATONALIZATZEKO PROIEKTUAREN LANAK HASIKO DIRA

Lanen aurrekontua 527.793,11€koa da, Espainiako Udalerrien eta Probintzien Federazioak (FEMP) finantzatzen du, “Berreskurapen, Eraldaketa eta Erresilientzia Planaren esparruan ingurune osasungarriak sortuz edo birgaituz bizimodu osasungarria sustatzeko ekintzak” deialdiaren barruan, 513.679,07€ euroko dirulaguntzarekin.

2023·10·06


Obra ASFALTADOS Y CONSTRUCCIONES MORGA, SL enpresari esleitu zaio, eta lanak 4 hilabete inguru iraungo du.

 

Orain arte egindako lanekin jarraituz (Euskadi plaza urbanizatzea eta Soraluze kalea oinezkoentzat egitea), proiektu berri honek Jai-Alai kalearen ingurunearekin homogeneoa den hiri-diseinua sustatzeaz gain, Soraluze kaleak, Euskadi plazak eta Legazpi kaleak osatzen duten ardatzaren oinezkoentzako lanak osatu nahi ditu; eta, horrela, batez ere oinezkoentzako aisialdirako hiri-ingurune garrantzitsua izango du Zumarragak.

 

Azken batean, helburua oinezkoen beharren eta ibilgailuen trafikoaren arteko oreka bilatzea da: alde batetik, kaleko merkataritza-jarduera indartuz, baina, bestetik, trafikoak bide publikoaren etorkizuneko erabiltzaileengan eta inguruko eraikinetan bizi direnengan izango duen eragina arinduz.

 

"Oinezkoaren aldeko apustua egingo da kalea berritzean: automobilak kalea zerbitzatuko du eta ez alderantziz".

 

Ondorioz, aldaketa, batez ere, ibilgailuen trafikoa berrantolatzean datza, inguruko bideen trazadura berrikusita, oinezkoentzako azalera lortuz, oinezkoentzako eremuak zabalduz, kalea berriro oinezkoentzako bihurtuz eta kaleen arteko komunikazio-ardatz nagusiak indartuz.

 

Jai-Alai kalearen diseinu berriak, oinezkoen izaerarekin, ibilgailuen trafikoa partzialki ezabatzea planteatzen du, eta baimendutako ibilgailuak eta zamalanetarako ibilgailuak aurrez ezarritako orduetan bakarrik igaro ahal izango dira lurpeko aparkalekura.

 

Oinezkoei dagokienez, arreta berezia eskaintzen zaie zeharkako kaleekin oinezkoentzako loturei, Iparragirre kaletik sartzeko sarbideari, Piedad kaletik sartzeko bideari, Legazpi kalearekiko edota Euskadi plazarekiko loturari; eta, bereziki, Zelai Arizti parketik oinezkoentzako zeharkako loturari eta Euskadi plazara alboko sarbiderako eskailerei eta igogailuari, Jai-Alai kaleko zatien elkargunean. Horrela, hiri-ingurunea behar bezala konfiguratzea eta behar bezala ulertzea erraztuko baita.

 

Obra hiru zatitan banatzen da.

 

- 1. zatia. Iparragirre kalea eta Jai-Alai kaleko bideen elkarguneraino.

- 2. zatia. Piedad kalea eta Jai-Alai kaleen elkarguneraino.

- 3. zatia. Legazpi kaleraino iristen den azken zatia, Euskadi plazarekin bat egiten duen tokian.

 

 

Hiru zatietan oinezkoen zabalera handitzen denean, zuhaitzak eta lorategi-eremu berriak jarriko dira (altzairuzko babesekin), eta ingurune atseginagoak sortuko dira pertsonentzat; halaber, hiri-altzariak jarriko dira: bankuak, paperontziak, bizikleta-aparkalekuak, piboteak, etab.

 

Hiri-argiztapenari dagokionez, dauden farolak egokitzea aurreikusten da, eta horiek birkokatzeko gutxieneko lan batzuk egitea.

 

Euri-urak biltzeari dagokionez, kanal eta hustubide berriak eraikiko dira, euri-urak egungo euri-uren kolektoreetara behar bezala isurtzea bermatzeko.

 

Udal hornidura eta saneamendu-sareko zerbitzu batzuk ere modu lokalizatuan berrituko dira. Zati horretan, konponketa puntualak Jai-Alai kalean dauden Euskadi plazako 7. eta 8. atarietako edateko uraren hartunea berritzea eta ur beltzen hartunea berritzea. Hartune horrek bi atarietako euri-urak ere baditu.

 

Lanak direla-eta, astelehenetik aurrera Iparragirre kaleko sarrera itxita egongo da. Ibilgailuen sarrera eta irteera Legazpi kaletik egingo da. Kale hau bi noranzkokoa izango da eta, horretarako, dauden aparkalekuak kenduko dira. Secundino Esnaola kaletik datozen ibilgailuek ezingo dute ezkerrera biratu Legazpi kalera sartzeko, Elizkaleko biribilgunera joan beharko dute eta Legazpi kalearen hasieran eskuinera biratu. Legazpi kaletik ateratzen diren ibilgailuak, aldiz, eskuinera nahiz ezkerrera biratu ahal izango dira, gaur egun egiten den bezala.