2025·10·07
Euskadi Lagunkoia Berriaren Gipuzkoako Lurralde Batzordea Zumarragan egiten ari da
Gaur goizean egin da Euskadi Lagunkoia Berria programaren Gipuzkoako Lurralde Batzordea, Zelai Arizti Kultur Etxean (Zumarraga). Programa hau Eusko Jaurlaritzako Ongizate, Gazteria eta Erronka Demografikoko Sailak sustatzen du.
Topaketan Gipuzkoako udal lagunkoien ordezkariak bildu dira, esperientziak partekatzeko eta ingurune lagunkoien, inklusiboen eta belaunaldien artekoen saretzea indartzeko helburuarekin.
Saioari hasiera eman dio Arantxa González Zumarragako Udaleko zinegotziak, ongietorria eginez bertaratutakoei eta lankidetzarako gune hauen garrantzia nabarmenduz.
Ondoren, Diana Pedraz, Eusko Jaurlaritzako Ongizate, Gazteria eta Erronka Demografikoko Saileko teknikaria, arduratu da programaren bilakaeraren berri emateaz. Pedrazek gogorarazi duenez, «Euskadi Lagunkoia hasieran adinekoengan zentratuta jaio zen, baina gaur egun norabide berria hartu du, ikuspegi belaunaldien artekoarekin; horregatik diogu orain Euskadi Lagunkoia Berria». Halaber, azpimarratu du «topaketa hauek aukera paregabea direla elkarrekin lan egiteko eta sare lagunkoikoan garatzen ari diren ekintzak ezagutzeko».
Jarraian, Andrea Pozo, Matia Institutuko teknikaria, aritu da azalpenak ematen udaletan egiten den jarraipen-lanari buruz, bileren eta topaketa periodikoen bitartez. Pozok azpimarratu du udalek elkar ezagutzea eta sinergiak sortzea funtsezkoa dela tokiko ereduak aberasteko, eta aurkeztu ditu Euskadi Lagunkoia Berria programaren materialak eta programak, baita egungo faseak eta baliabide horiek guztiak biltzen dituen katalogo berria ere.
Jardunaldian, halaber, aurkeztu da Euskadi Lagunkoia Berria 2025 Erronka, zeinak etxebizitzari lotutako beharrak identifikatzea eta lantzea du ardatz, zahartze aktiboaren eta belaunaldien arteko lagunkortasunaren ikuspegitik. Helburua da autonomia, elkarbizitza eta bizi-kalitatea sustatzen dituzten inguruneak bultzatzea.
Era berean, iragarri da Lagunkoitasuneko Praktika Onen Jardunaldia, datorren azaroaren 12an Vitoria-Gasteizen egingo dena, udal eta erakunde desberdinen esperientzia inspiratzaileak partekatzeko.