2024·05·17
LEGAZPI KALEA ALDI BATERAKO IXTEA, ERDI-OINEZKOTZE ETA BERRURBANIZATZE LANAK DIRELA ETA
Udalak kudeatuko ditu merkatarien beharrak itxierak irauten duen bitartean, eta zamalanak Jai Alai kalean egingo dira.
Legazpi kalean egiten ari diren erdi-oinezkotze eta berrurbanizatze lanak direla eta, bide hori itxita egongo da datorren astelehenetik aurrera, bertatik ibilgailuak ibiltzea eragozten duten lanak amaitu arte. Neurri hori beharrezkoa da segurtasuna eta lanen garapen egokia bermatzeko.
Next Generation EB funtsek finantzatutako obra hau "Zumarraga, eredu komertzial digital eta jasangarria sendotuz" proiektuaren parte da. Proiektu honen eta horrekin lotutako ekintza guztien helburu nagusia tokiko merkataritza bultzatzea da, merkatariei zein bizilagunei mesede egingo dien hiri-ingurune irisgarriagoa, modernoagoa eta iraunkorragoa sortuz.
Epe horretan, Euskadi Plazarako sarbidea ere mugatuta egongo da. Egoera horrek eragozpenak sor ditzake, eta aldez aurretik eskertzen dugu inguruko bizilagun eta merkatari guztien ulermena eta lankidetza.
Ohiko zamalanak Jai Alai kaletik egin beharko dira. Hala ere, inpaktua minimizatzeko, Udalak prozedura berezi bat ezarri du eraginpeko eremuan kokatutako saltokietara sartu behar duten banatzaileentzat. Horiek baimena eskatu beharko diote Udaltzaingoari, Soraluze kaletik Euskadi Plazarako sarbide puntuala kudea dezan.
Eskerrak eman nahi dizkiegu herritar guztiei lan garrantzitsu hauetan erakutsitako pazientzia eta laguntzagatik, gure udalerriko bizi-kalitatea hobetzea eta guztiontzako hiri-ingurune irisgarriagoa eta atseginagoa eskaintzea baitute helburu.