Zumarragako
udala

ZUMARRAGA ABIAPUNTU IZANGO DA BARRUALDEA ETA KOSTA LOTUKO DITUEN 47 KM-KO IBILBIDE BERDEAREN BIDEGORRIAN

Zumarragak Zumaia-Zumarraga bidegorri ardatzaren aurrerapausoak ospatzen ditu, mugikortasun jasangarria, lurralde-kohesioa eta tren-ondarearen berreskuratzea sustatzen dituen azpiegitura estrategikoa

Zumaia eta Zumarraga lotuko dituen bidegorriaren eraikuntza aurrera doa. Dagoeneko martxan daude Narrondo (Zumaia) eta Iraeta (Zestoa) arteko tarteko lanak, eta horrek beste mugarri bat ezartzen du proiektu handi honen barruan. Proiektua amaitutakoan, 47 kilometroko ibilbide berde jarraitu bat izango du herritarrak eskura, Zumarragatik kostalderaino (Zumaia) bizikletaz edo oinez joateko aukera eskainiz. Eguneroko mugikortasuna eraldatuko duen azpiegitura izango da, osasungarriagoa, seguruagoa eta ingurumenarekiko errespetuzkoa sustatuz.

Zumarragatik ilusioz eta konpromisoz bizitzen da proiektu hau. Izan ere, udalerrien arteko loturak hobetzeaz gain, gure herriaren eredua indartzen du: bizigarriagoa, jasangarriagoa eta pertsonen neurrira egina. Lurralde barruko eta kanpoko mugikortasunerako abiapuntu izateak agerian uzten du Zumarraga jasangarritasunerantz eta herritarren ongizaterantz doan trantsizioan erdigunean dagoela.

Urola tren zaharraren ibilbidea berreskuratzeak gure tren-ondare historikoari zentzua emateaz gain, erabilera berria eskaintzen dio herritarren egunerokoari egokituta. Urola Garaiko erreferentea den heinean, Zumarraga adibide bihurtzen da iragana errespetatzea etorkizun berdeago eta bidezkoago bat eraikitzeko oinarri izan daitekeela erakutsiz.

Zumarragako alkatea, Mikel Serrano, lanen bisita instituzionalean izan zen Eusko Jaurlaritzako, Gipuzkoako Foru Aldundiko eta beste udalerrietako ordezkariekin batera. Bere hitzetan, “bidegorri ardatz honek herriak ez ezik, balioak ere konektatzen ditu: jasangarritasuna, osasuna, ongizatea eta lurralde-kohesioa. Zumarragako herritarrek segurtasunez eta modu jasangarrian mugitzeko aukera izango dute, ohitura osasungarriak sustatuz eta gure ingurunearekiko harremanak sendotuz”.

Proiektua, neurri batean, Europako Next Generation funtsekin finantzatuko da, eta Gipuzkoako Hiri Bizikletarako Lurralde Plan Sektorialaren eta Helmuga Jasangarrien Planaren barruan kokatzen da. Lurralde-erakundeen arteko lankidetzari esker, Urola bailarako eskari historiko bati erantzuna emango dio. Aurreikuspenen arabera, 2026 amaieran edo 2027 hasieran egongo da guztiz erabilgarri, Zumaia, Zestoa, Azpeitia, Azkoitia eta Zumarraga segurtasunez eta ingurumenarekiko begirunez lotuz.

Zumarragatik, garapen-eredu bat sustatzen jarraitzen dugu: pertsonak erdigunean jartzen dituen eredua, gure lurraldearekiko lotura indartzen duena eta herritar aktibo, kontziente eta ingurunearekin konprometitu baterantz irekia dena. Bidegorria ez da soilik bizikletentzako bidea: bizi-kalitate hobe baterako bidea da.