ZUMARRAGA, ESPAINIAKO HIRU PROIEKTU ONENEN ARTEAN: EUROPAKO FUNTSETAN EGINDAKO KUDEAKETA ONAREN AITORPENA
2025·10·03
ZUMARRAGA, ESPAINIAKO HIRU PROIEKTU ONENEN ARTEAN: EUROPAKO FUNTSETAN EGINDAKO KUDEAKETA ONAREN AITORPENA
#EuropaSeSiente 2025 finala urriaren 10ean izango da. Herritar guztiei gonbidapena egiten diegu aurkezpena jarraitzeko eta botoa emateko: aitortza hau guztiona da.
Zumarraga izan da hautatua “Hurbila” kategorian finalista gisa #EuropaSeSiente 2025 estatu mailako lehiaketan. Europako funtsekin finantzatutako proiektu onenak saritzen ditu lehiaketa honek, lurraldeetan izan duten eragin errealagatik. Estatuko hiru ekimen onenen artean egoteak gure herria erreferente bihurtzen du, bai funtsen kudeaketan, bai tokiko eraldaketan.
Europako funtsen kudeaketa eredugarria
Sari hauek ez dute soilik obra ikusgarria baloratzen, baizik eta nola kudeatu den Europako finantzaketa. Zumarragako Udalaren “Zumarraga, merkataritza-eredu digital eta jasangarria” proiektua Next Generation funtsen bidez garatu da, eta esku-hartze integral bat ahalbidetu du: hirigintza, Azokaren berrikuntza, merkataritzaren digitalizazioa eta profesionalizazioa.
Helburua argia izan da: jarduera sortzea, tokiko ekonomia indartzea eta etorkizunerako ibilbide-orri argi bat marraztea, Ekonomia Hiritar Iraunkorraren Planaren eta Zumarragaren estrategia komertzial eta turistikoaren barruan.
Urteetako lan kolektiboaren esker, Zumarraga finalera iritsi da, proiektuak gauzatzeko gaitasuna erakutsiz. Aitorpen hau plangintzari, kudeaketa gardenari eta Udalaren, merkatarien eta herritarren arteko lankidetzari egiten zaio. (honelakoak aurretik ere jaso dira, esaterako, Barne Merkataritzako Sari Nazionalean eta Landaola sarietan).
Hemen ikus dezakezu Zumarragaren bideo ofiziala #EuropaSeSiente 2025 finalerako:
Urriaren 10a: finala eta nola lagundu Zumarragari
#EuropaSeSiente urteko ekitaldia Santa Coloma de Grameneten egingo da, urriaren 8tik 10era. Proiektuen finala urriaren 10ean izango da. Goizean zehar (10:00etatik 12:30era) finalista diren kategoriak aurkeztuko dira, eta aurkezpen bakoitzaren ondoren botoa emateko tarte labur bat irekiko da Slido plataformaren bidez.
Gainera, 13:30ak inguruan, azken bozketa bat irekiko da “Urrezko Izarra” aukeratzeko, kategoria guztietako irabazleen artean.
Nola lagundu Zumarragari
- Konektatu urriaren 10ean ekitaldiaren streaming ofizialera.
- Gure proiektua aurkeztu ondoren, botoa emateko aukera irekiko da minutu gutxitan.
- Denbora labur horretan zure botoa erabakigarria izan daiteke Zumarragak garaipena lortzeko.
Zure botoak balio du: lehiaketa honetan, epaimahai teknikoaren balorazioaz gain, herritarren eta bertaratutakoen babesa funtsezkoa da. Zure laguntzarekin erakutsiko dugu Zumarraga herri hurbil, berritzaile eta etorkizuneko ikuspegiduna dela.
Guztion proiektua
“Aitorpen hau ez da soilik Udalaren aitorpena: merkatarien, familien, elkarteen, talde teknikoen eta parte hartu duten herritar guztien aitorpena da. Aukera europarra ondo kudeatzen denean, herria eraldatu eta tokiko ekonomiari benetako aukerak sortzen zaizkiola frogatu dugu”, adierazi du Mikel Serrano alkateak.
“Gonbidapena egiten dizuegu gure proiektuaren bideoa ikustera eta urriaren 10ean gurekin batera botoa ematera: lorpen partekatua da, eta babes bakoitzak balio du”, gehitu du alkateak.
Eskerrik asko, Zumarraga
Udaletik bihotzez eskertu nahi diegu proiektu hau posible egin duten pertsona eta kolektibo guztiei: merkatariei, ekoizleei, elkarteei, ikastetxeei, teknikariei eta udal taldeei. Aitorpen hau dagoeneko Zumarragarena da; zure botoarekin urrats bat gehiago egin dezakegu eta erakutsi nola Europako funtsen kudeaketa onak gure eguneroko bizitza hobetzen duen.
Urriaren 10ean, hartu minutu batzuk: eman botoa Zumarragari!