Zumarragako
udala

Maiatzaren 23an, Zumarragak Aniztasun Kulturalaren Nazioarteko Eguna ospatzeko jardunaldi berezia hartuko du, Gipuzkoako Foru Aldundiko Kultura eta Lankidetza Sailak eta Zumarragako Udalak elkarlanean antolatuta. Egitaraua Zelai Arizti antzokian eta frontoi inguruan garatuko da, eta proposamen artistiko, ikus-entzunezko eta komunitarioak bilduko ditu, aniztasun kulturala partekatutako aberastasun gisa eta bizikidetza indartzeko tresna gisa balioan jartzeko helburuarekin.

Ekimena gaur goizean aurkeztu dute Goizane Álvarez foru diputatuak eta Mikel Serrano Zumarragako alkateak. Bi erakundeek azpimarratu dute ezinbestekoa dela topagune ireki, inklusibo eta parte-hartzaileak sustatzen jarraitzea.

Mikel Serrano alkateak adierazi duenez, “Zumarragak berriz ere erakusten du herri bizia, irekia eta anbizio kulturala duena dela. Jardunaldi honek lehen mailako egitaraua ekarriko du gure herrira, proposamen artistiko, ikus-entzunezko eta komunitarioekin, eta Zumarraga Gipuzkoako aniztasun kulturalaren topagune bihurtuko du”.

Gainera, Serranok nabarmendu du ekimenak izaera parte-hartzailea duela: “Ekimena gure gazteekin hartutako konpromiso bati erantzuten dio. Gazte Asanbladak Udal Gobernuari egun multicultural bat sustatzearen garrantzia helarazi zion, 2025ean Izazpin egindako esperientziaren ildotik, eta gaur, entzute eta parte-hartzetik eraikitako egitarauarekin, eskaera horri erantzuna ematen diogu”.

Udalak azpimarratu du jardunaldi hau bat datorrela Zumarragaren nortasuna definitzen duten balioekin: bizikidetza, inklusioa eta aniztasuna. Elkarbizitzan, errespetuan eta komunitate ireki eta kohesionatu baten eraikuntzan aurrera egiten jarraitzen duen udalerria da Zumarraga.

Goizane Álvarezek ere azpimarratu du kulturak topagune gisa duen eginkizuna, eta adierazi du aniztasuna “gure eguneroko bizitzaren parte” dela eta, ondo zainduta, “bizikidetza indartzeko tresna oso indartsua” dela.

Egitaraua

Jardunaldia 10:45ean hasiko da Zelai Arizti antzokian, aurkezpen instituzionalarekin. Ondoren, Verdini Dantza Talde inklusiboak El destello de Verdini pieza eskainiko du, aniztasun funtzionala duten pertsonek sortu eta interpretatutako lana, agertokia desberdintasunak aitortu eta ospatzeko espazio bihurtzen duena.

Jarraian, Zinekin proiektua aurkeztuko da, ikus-entzunezko eduki, elkarrizketa eta harrera eta aniztasun kulturala lantzen duten esperientziekin.

13:00etatik aurrera, jarduera kanpora pasatuko da, frontoi ingurura, Hondurasko Dantza Folklorikoen Taldearen eta Booloo Senegal Elkartearen emanaldiekin, azken hau Sapali perkusio taldearen zuzeneko musikarekin lagunduta. Bi taldeek Gipuzkoako Foru Aldundiak sustatutako “Ahotsak. Sustrai konektatuak” proiektuan parte hartu dute aurrez.

Jardunaldia herritar guztientzako arroz solidarioarekin amaituko da, parte-hartzaileentzako topagune eta bizikidetza espazio gisa.

Egitaraua

10:45 – Aurkezpen instituzionala
10:55 – Verdini-ren emanaldiaren aurkezpena
11:00 – Verdini Dantza Taldea: El destello de Verdini
12:00 – Zinekin aurkezpenaren sarrera
12:03 – Zinekin proiektuaren aurkezpena
13:00 – Hondurasko Dantza Folklorikoen Taldea
13:30 – Booloo Senegal Elkartearen emanaldia
14:00 – Arroz solidarioa Zelai Arizti parkean