Zumarragako
udala

ZUMARRAGAK BESTE URRATS BAT EMAN DU ETXEBIZITZAREN ARLOKO ESTRATEGIAN, FAUSTINO ORBEGOZOKO 24 ZUZKIDURA-BIZITOKIEN PROIEKTUAK AURRERA EGINDA

Miguel de los Toyos Etxebizitzako sailburuordeak eta Mikel Serrano Zumarragako alkateak eremua bisitatu dute, obrak Construcciones Amenabar S.A. enpresari esleitzeko proposamena egin ondoren. Jarduketak 4,84 milioi euroko aurrekontua eta 20 hilabeteko exekuzio-epea ditu. Zumarragan 176 bizitegi-irtenbide publiko berri sustatzeko estrategiaren parte da, 20,3 milioi euro inguruko inbertsioa mobilizatuz eta, aldi berean, irisgarritasuna hobetzeko eta lehendik dagoen etxebizitza-parkea hobeto aprobetxatzeko beste jarduketa batzuk garatuz.

Miguel de los Toyos Eusko Jaurlaritzako Etxebizitzako sailburuordeak Zumarraga bisitatu du Mikel Serrano alkatearekin batera, Faustino Orbegozo zahar-etxearen eremuan 24 zuzkidura-bizitoki eraikitzeko proiektuak emandako beste aurrerapauso baten berri emateko.

Bisita obren kontratazio-prozeduran aurrerapauso garrantzitsua eman ondoren egin da. Construcciones Amenabar S.A. proposatu da esleipendun, 4.838.357,95 euroko zenbatekoarekin, BEZa barne, eta 20 hilabeteko exekuzio-epearekin, prozeduraren azken izapide juridikoak amaitzeke daudela.

Bisitan adierazitako aurreikuspenaren arabera, obrak 2026a amaitu aurretik hasi ahal izango dira. «Gure helburua da urtea amaitu baino lehen hemen hondeamakinak lanean egotea», azaldu du De los Toyosek. Epeak betetzen badira, aurreikusitako 20 hilabeteko exekuzioak jarduketa 2028ko uda inguruan amaitzea ahalbidetuko luke.

Jarduketari esker, 24 zuzkidura-bizitoki izango dituen eraikin berri bat egingo da: 20 bizitoki logela bakarrekoak izango dira eta lau bi logelakoak; horietako bat mugikortasun urriko pertsonentzat egokituta egongo da. Proiektuak 24 garaje-plaza, gune komunak eta udal erabilera dotazionalerako 475 metro koadro inguruko lokal bat ere aurreikusten ditu.

BELAUNALDIEN ARTEKO PROIEKTU AITZINDARIA

Faustino Orbegozoko proiektuaren ezaugarri berezietako bat belaunaldien arteko izaera da. Zuzkidura-bizitokiek ohiko etxebizitza babestu baten erregimen desberdina dute, eta profil eta behar desberdinei erantzuteko aukera emango dute.

Batetik, gazteei emantzipaziorako lehen urratsa emateko aukera eskaintzea dute helburu, beren bizitzako etapa jakin batean bizitegi-irtenbide bat eskainiz. Bestetik, beren egoera pertsonalagatik bestelako bizitegi-irtenbide bat behar duten adinekoentzat ere aukera izan daitezke, esaterako beren ohiko etxebizitzan irisgarritasun-arazoak dituztenean edo nahi gabeko bakardade egoeren aurrean.

Miguel de los Toyosek planteamendu horren izaera berritzailea nabarmendu du bere agerraldian, eta Zumarraga aitzindaritzat jo du belaunaldien arteko ikuspegi horri dagokionez, zuzkidura-bizitokiak etxebizitza-politika publiko beraren barruan behar desberdinei erantzuteko tresna gisa erabiliz.

Adinekoen kasuan, ereduak uzten duten etxebizitza Bizigune programaren esku jartzeko aukera ere aurreikusten du. Horrela, jarduketak bi norabidetan eragin dezake: pertsonari bere egoerara hobeto egokitutako bizitegi-irtenbidea eskaintzea eta, aldi berean, lehendik dagoen etxebizitza bat berriro alokairu-eskaintzara itzultzen laguntzea.

URTEETAKO LANAREN ETA ERAKUNDEEN ARTEKO LANKIDETZAREN EMAITZA

Faustino Orbegozoko proiektua Zumarragako Udalak eta Eusko Jaurlaritzak hainbat urtez egindako lanaren emaitza da.

Udalak 2020an erosi zuen zahar-etxe zaharra, Faustino Orbegozo Fundazioarekin egindako kudeaketen ondoren, eta, geroztik, eremu hori etxebizitza-politika publikoaren zerbitzura jartzeko beharrezko hirigintza- eta administrazio-urratsak eman ditu.

Prozesu horren barruan, Udalak sustapena garatzeko beharrezko lursailak Eusko Jaurlaritzaren esku jarri zituen, higiezinaren erosketatik eta hasierako plangintzatik gaur egun obrak hasteko atarian dagoen proiektura iristea ahalbidetuz.

Mikel Serranok nabarmendu du erakundeen arteko lankidetza iraunkorra ezinbestekoa dela tamaina honetako proiektuak errealitate bihurtu ahal izateko.

«Erakundeen arteko lankidetza da etxebizitzaren arloan dugun arazoari erantzuteko bidea», adierazi du alkateak, eta Faustino Orbegozo bezalako jarduketak administrazioen arteko urteetako plangintza, negoziazio eta lanaren emaitza direla azpimarratu du.

De los Toyosek ere Zumarragatik egindako lanaren jarraikortasuna nabarmendu du. «Hau beste bizitegi-irtenbide bat da, baina ez da bakarra», adierazi du sailburuordeak, Faustino Orbegozo udalerrian garatzen ari diren jarduketa guztien barruan kokatuz.

176 BIZITEGI-IRTENBIDE BERRI ETA 20 MILIOI EUROTIK GORAKO INBERTSIOA ZUMARRAGAN

Faustino Orbegozo azken urteotan Zumarragan sustatutako etxebizitza publikoko hiru proiektu nagusietako bat da, Zumarragako Udalaren eta Eusko Jaurlaritzaren arteko lankidetzaren bidez.

Eitzaga Berriko alokairuko 108 etxebizitza babestuen entrega-prozesua dagoeneko amaituta dago eta bertan bizi dira esleipendunak. Sustapen horrek 11 milioi euro inguruko inbertsioa ekarri du.

Horri Faustino Orbegozoko 24 zuzkidura-bizitokiak gehitzen zaizkio, 4.838.357,95 euroko inbertsioarekin, baita Forjasen alokairuko 44 etxebizitza babestu berri eraikitzeko proiektua ere. Azken jarduketa horretarako 4,5 milioi euro inguruko inbertsioa aurreikusten da.

Guztira, hiru sustapenek 176 bizitegi-irtenbide publiko berri eta 20,3 milioi euro inguruko inbertsioa osatzen dute Zumarragan.

Kopuru horrek urte hauetan Udalak jarduketak posible egiteko garatutako lana ere islatzen du: lursailak eta higiezinak erosi eta eskuragarri jartzea, hirigintza-plangintza egokitzea, hirigintza-izapideak egitea, hitzarmenak sinatzea eta Eusko Jaurlaritzarekin etengabeko lankidetza garatzea.

Horrela, udal-kudeaketak eta erakundeen arteko lankidetzak etxebizitzaren arloan 20 milioi eurotik gorako inbertsio publikoa Zumarragara erakartzea, mobilizatzea eta konprometitzea ahalbidetu dute, hainbat eremu eta proiektu herritarrentzako bizitegi-aukera berrietan bihurtuz.

«Eitzaga Berriko 108 etxebizitzak, Faustino Orbegozoko 24 zuzkidura-bizitokiak eta Forjaseko 44 etxebizitzak proiektu desberdinak dira eta une desberdinetan daude, baina helburu bera dute: Zumarragan etxebizitza eskuragarria lortzeko aukerak handitzea», adierazi du Serranok. «176 bizitegi-irtenbide berriz eta gure udalerrian mobilizatutako 20 milioi eurotik gorako inbertsioaz ari gara. Lan garrantzitsua da, baina badakigu oraindik ere asko dagoela egiteko».

IRISGARRITASUNA HOBETZEKO BI JARDUKETA BERRI

Proiektu horien garapena Zumarragako hainbat eremuren arteko irisgarritasuna eta oinezkoen loturak hobetzeko jarduketa berriekin ere osatzen ari da.

Horietako bat Faustino Orbegozoko inguruneari zuzenean lotuta dago. Txurruka eta Elkano kaleen ingurutik 24 zuzkidura-bizitokiak eraikiko diren eremura dagoen desnibela gainditzeko igogailu berri bat egitea aurreikusten da.

Jarduketak 800.000 euro inguruko inbertsioa izango du eta Eusko Jaurlaritzak finantzatuko du. Une honetan dagozkion azterketa geoteknikoak egiten ari dira, eta 2027an proiektuaren lizitazioan eta gauzatzean aurrera egitea aurreikusten da.

Igogailu berriak nabarmen hobetuko du Faustino Orbegozoko ingururako irisgarritasuna, eta zuzkidura-bizitoki berrien eraikuntzak ekarriko duen eraldaketa osatuko du.

Aldi berean, Leturias inguruan bigarren igogailu bat egiteko proiektuan ari da lanean Udala. Jarduketa hori aurrekotik bereizita dago eta ArcelorMittal/Orbegozo instalazio zaharren ingurutik udalerriko eremu horretarako lotura hobetzeko balioko du.

Beraz, irisgarritasuna hobetzeko bi proiektu desberdin dira: bata Txurruka eta Elkano kaleen ingurua Faustino Orbegozoko bizitegi-eremu berriarekin lotzeko, eta bestea fabrika zaharraren ingurutik Leturiaserako lotura hobetzeko.

Bi jarduketek planteamendu bera partekatzen dute: hiri-eraldaketa eta bizitegi-irtenbide berrien sorrera Zumarragako hainbat punturen arteko eguneroko mugikortasuna eta loturak erraztuko dituzten hobekuntzekin batera garatzea.

ETXEBIZITZA BERRIAK ERAIKITZEA BAINO GEHIAGO

Udala lanean ari da, gainera, etxebizitza-politika sustapen berriak eraikitzera soilik mugatu ez dadin.

Ildo horretan, Udalak udalerriko etxebizitza hutsen azterketa egin du, eta horren bidez Zumarragan hutsik dauden 139 etxebizitza identifikatu dira.

Diagnostiko horretatik abiatuta, helburua da etxebizitza horiek hutsik egoteko arrazoiak hobeto ezagutzea, jabeekin harremanetan jartzea eta alokairu publikoko programetan edo eskaintza handitzeko beste formula batzuetan sartzea ahalbidetu dezaketen aukerak aztertzea.

Lan horrek garrantzi berezia du dagoen eskaera kontuan hartuta. 2026aren hasieran, Etxebidek Zumarragarekin lotutako 369 bizikidetza-unitate zituen etxebizitza-eskatzaile gisa erregistratuta, eta horietatik 300ek alokairuko etxebizitza eskatzen zuten.

Aldi berean, Udala jarduerarik gabeko beheko solairuen eta merkataritza-lokal hutsen azterketan ere sakontzen ari da, jakiteko zein espazio babestu behar diren merkataritza-jarduera mantentzeko eta zeinek eskain ditzaketen erabilera-aukera berriak, betiere hirigintza-araudiak eta bizigarritasun-baldintzek horretarako aukera ematen badute.

Zumarragak badu, gainera, udalerriko eremu jakin batzuetan erabilera tertziarioko lokalak etxebizitza bihurtzeko aukera arautzen duen ordenantza bat, betiere dagokion azterketa teknikoa egin eta bizigarritasun-baldintza guztiak betetzen badira.

Estrategiaren helburua da, beraz, aldi berean lantzea etxebizitza publiko berria sortzea, lehendik dagoen etxebizitza-parkea mobilizatzea, eraikitako ondarea hobeto aprobetxatzea eta bizitegi-eremuen irisgarritasuna eta ingurunea hobetzea.

«Etxebizitza herritarren behar nagusietako bat da, eta ez dago horri erantzuteko tresna bakar bat», adierazi du Serranok. «Eraiki egin behar dugu, dagoeneko duguna hobeto aprobetxatu, datuak ezagutu, inguruneak hobetu eta akordio eta formula berriak bilatzen jarraitu. Garrantzitsuena da jarduketa bakoitzak Zumarragan beren bizi-proiektua garatu nahi duten pertsonei aukera erreal gehiago eskaintzea».