2026·05·26
Joan den otsailean egin zen lehen boxeo gaualdiak izan zuen harrera onaren ondoren, Zumarraga berriro ere boxeoaren topagune bihurtuko da ekainaren 6an. Euskoboxek antolatutako hitzordua Beloki pilotalekuan izango da, 20:00etatik aurrera, eta borrokaldi amateur zein profesionalak hartuko ditu. Ekimen honek udalerriak kirolaren, bizi-ohitura osasungarrien eta kirol eskaintza anitzaren alde egiten duen apustua indartzen jarraitzen du.
Egitarauan Erlantz Tejadaren borrokaldi profesionala izango da ikusgai, baita zortzi borrokaldi amateur ere. Horietan parte hartuko dute bertako boxeolariek ere, tartean “Jauna”k eta "Moreno"k, herriko zaleen babesarekin berriro ere ringera igoko denak. Giro aparta, emozioa eta maila handiko ikuskizuna espero dira gau osoan zehar.
Bigarren gaualdi honek agerian uzten du boxeoak Zumarragan izan duen hazkundea eta herritarren artean piztu duen interesa, adin ezberdinetako pertsonak kirolera eta bizimodu aktiboago batera gerturatuz.
Aurrez erositako sarrerak Aitube Berri Tabernan, Urzubi Tabernan eta Galilea Tabernan eskuratu ahal izango dira. Bestalde, ekitaldiaren egun berean, 18:00etan, amateur borrokaldien pisaketa egingo da Galilea Tabernan.
Bertaratzeko erraztasunak eskaintzeko, Udalak gogorarazi du La Salle ikastetxeko kantxa doako aparkaleku gisa erabilgarri egongo dela gaualdian zehar.
Zumarragako Udalak herritar guztiak eta kirolzaleak animatu nahi ditu Beloki pilotalekura gerturatzera, kirol giroz eta jardueraz beteriko beste gaualdi batez gozatzeko. Ekitaldi honek, beste behin ere, Zumarragak kirolaren, diziplina aniztasunaren eta herritarren ongizatearen alde duen konpromisoa erakusten du.