Zumarragako
udala

Zumarragako Udalak Enplegu Proiektu Integralen programaren barruan prestakuntza amaitu duten zortzi lagunei diplomak banatzeko ekitaldia egin du gaur ikaztegian, udal lantaldearen egoitzan eta biltegian. Eusko Jaurlaritzarekin eta Lanbiderekin batera bultzatutako ekimen honek Udalak trebakuntzaren eta enplegagarritasunaren alde egindako apustua berretsi egiten du, batez ere laneratzeko zailtasun handienak dituzten kolektiboentzat.

Bertan Mikel Serrano Zumarragako alkatea, Mikel Torres Eusko Jaurlaritzako lehendakariorde eta Ekonomia, Lan eta Enplegu sailburua, Paco Pedraza Lanbideko zuzendari nagusia, Rosa Maiza Zumarragako Udaleko Ekonomia Sustapen, Toki Garapen eta Berrikuntzako zinegotzia, Gloria Albarran programaren arduraduna, UGLEko ordezkariak, prestakuntzaz arduratzen den erakundea, eta Siderurgia Integraleko Langileen Fundazioa, parte-hartzaileen lan-orientazioaz arduratzen dena izan dira.

Hiru hilabetez, igeltserotzan, margolaritzan eta lan-arriskuen prebentzioan 200 orduko prestakuntza jaso dute Costi, Youssef, Sergio, Luis Fernando, Mohamed, Denis, Ane eta Javierrek. Gaurtik aurrera, programaren bigarren faseari ekingo diote, sei hilabeteko kontratuarekin Zumarragako Udalean, eta udal instalazioetan mantentze eta konponketa lanak egingo dituzte bertan. Horrez gain, Siderurgia Integraleko Langileen Fundazioak banakako laguntza eta lan-orientazio prozesua egingo die, lan-merkatuan sartzeko aukerak hobetzeko.

Proiektu honek 140.000 euroko aurrekontua du guztira, eta horietatik 136.920 euro Lanbidek finantzatu ditu. Zumarragako Udalak 2015ean abiatutako estrategia baten barruan kokatzen da, orduan sortu baitzen ekonomia sustatzeko eremu espezifiko bat langabezia tasa murrizteko helburuarekin, garai hartan %15,78an zegoena.

2015az geroztik, Zumarragako Udalak, Lanbideren laguntzen eta beste programa batzuen bidez, 56 pertsona kontratatu ditu Tokiko Enplegu Ekintzen eta Gazte Bermeko Programen aterkipean; horietatik 27 emakumeak izan dira, eta 21 gazteak. Gainera, hainbat prestakuntza- eta enplegu-programa sustatu ditu, hala nola “Ostalarilan” proiektua 2020an, iturgintzako eta berokuntza- eta klimatizazio-aparatuak instalatzeko Gazte Enplegurako Programa Operatiboa, "Aukerak Eraikiz" eraikuntzan eta obra zibilean, eta "Aktibatu zure enplegagarritasuna" 2023an 45 urtetik gorakoentzat.

Guztira, 100 pertsona inguruk hartu dute parte programa horietan, eta guztira 1.800.000 euroko inbertsioa egin da; horietatik 1.250.000 euro diruz lagundu dira eta 550.000 euro Udalak jarri ditu.

Kontziliaziorako laguntzak eta formazio bekak ere bultzatu ditu Udalak, baliabide ekonomiko faltagatik edo familia ardurengatik inork bere enplegagarritasuna hobetzeari utz ez diezaion bermatzeko. Horrez gain, nabarmentzekoa da ZuMas Zainduz laneratze-enpresaren sorrera, Siderurgia Integraleko Langileen Fundazioarekin elkarlanean: bi urteko jarduna eta gero gaur egun 26 pertsonari ematen ari zaie lana, eta 47 kontratazio lortu zituen 2024an.

Otsaileko azken datuek %10eko langabezia tasa islatzen dute Zumarragan: 469 pertsona daude langabezian, horietatik %65ek oinarrizko ikasketak dituzte, %20k 35 urte baino gutxiago eta ia %30ek 55 urte baino gehiago. Datu horiek agerian uzten dute prestakuntza gutxien duten pertsonen laneratzea hobetzeko prestakuntzan lanean jarraitu behar dela, baita emakumeentzako programa espezifikoak sustatu behar direla ere.

Mikel Serrano alkateak Udalak lan aukerak sortzeko duen konpromisoa nabarmendu du: "2015etik, Zumarragak apustu sendoa egin du enpleguaren alde, bereziki gehien behar duten pertsonentzat. Honen moduko ekimenei esker, 100 pertsona inguru kontratatu ditugu azken urteetan, lan etorkizun inklusiboago bat eraikitzeko instituzioen arteko elkarlana gakoa dela erakutsiz. Baliabideak bideratzen jarraituko dugu, eta ditugun aukera guztiak baliatuko ditugu kolektibo ahulenei enplegua lortzen laguntzeko".

Bestalde, Mikel Torres Lehendakariordeak Zumarragak enplegu proiektuak inplementatzeko egindako lana goraipatu du: "Eusko Jaurlaritzatik enplegagarritasuna hobetzeko ekimen asko bultzatzen ditugu, baina Zumarraga bezalako udalerrietan bihurtzen dira errealitate. Udalaren kudeaketak eta enpleguarekin duen konpromisoak ekintza horiek eraginkorrak eta eraldatzaileak izatea eragiten dute, eta horregatik haien ahalegina aitortu eta eskertu nahi dugu".

Zumarragako Udalak enplegagarritasunarekin duen konpromisoa berresten du, eta lanean jarraituko du Lanbiderekin eta Eusko Jaurlaritzarekin, herritarrentzako lan-aukera berriak garatzeko. Alde horretatik, bereziki eskertzen da lehendakariordearen eta Lanbideko zuzendari nagusiaren bisita eta babesa, haien lankidetza funtsezkoa baita programa horiek arrakasta izan dezaten.