2024·12·16
Gaur, Zumarragako Azokako Baserritarren Nabean, “Zumarraga eredu komertzial digital eta jasangarria” proiektuaren amaiera-ekitaldia egin da. Ekimen hori funtsezkoa da udalerriaren eraldaketa ekonomia- eta hiri-eraldaketarako. Ekitaldian hainbat agintari garrantzitsu izan dira, hala nola Noemí López Gobernuaren ordezkariordea, Javier Hurtado Eusko Jaurlaritzako Turismo, Merkataritza eta Kontsumoko sailburua, Gabriel Gutierrez Eusko Jaurlaritzako Ekonomia, Lan eta Enplegu Saileko Plangintzako eta Egiturazkoak ez diren Funtsetako zuzendaria, José Ignacio Asensio Gipuzkoako lehen diputatu nagusiordea eta Azahara Dominguez Mugikortasuneko, Turismoko eta Lurralde Antolaketako diputatua, besteak beste.
Bere hitzaldian, Mikel Serrano Zumarragako alkateak proiektuak “hiri-ekonomia digitalaren eredu bat finkatzea ahalbidetu duela nabarmendu du, jasangarria eta etorkizuneko erronkei egokitua”, azken lau urteetan 4,5 milioi euro baino gehiagoko inbertsioari esker, hein batean Next Generation EU Funtsek finantzatuta. Serranok azpimarratu duenez, “egindako jarduerek hiri-espazioak eraldatu dituzte, tokiko merkataritza duindu dute eta udalerri gisa dugun nortasuna indartu dute”.
Ekitaldian, gauzatutako jarduketen aurkezpena egin da, besteak beste, Legazpi kalea erdi oinezkoentzat jartzea, Azokako espazioa berritzea eta “Zumarraga Berrikusi” bezalako tresna digitalen garapena, dinamizazio komertzialeko hainbat kanpainaz gain. Rosa Maiza Sustapen Ekonomikoko zinegotziak nabarmendu duenez, “egindako lanak eragin positibo zuzena izan du Zumarragako hiri-ekonomian, eta merkataritzari egungo eta etorkizuneko erronketara egokitzen lagundu dio”. “Etorkizuneko ikuspegi berarekin jarraituko dugu lanean, beti sektorearen eskutik eta erakundeen babesarekin”, amaitu du.
Bestalde, Gabriel Gutierrezek, Plangintzaren eta Egiturazkoak ez diren Funtsen zuzendariak, proiektuaren arrakasta “10.000 biztanletik beherako udalerrientzat eredu” gisa baloratu du, esleitutako funtsen % 100 aprobetxatzea nabarmenduz. Gainera, Javier Hurtadok bere hitzaldian azpimarratu duenez, “iraunkortasuna eta dinamizazio komertziala integratzen duten hiriak, Zumarraga kasu, hiri-bizikidetza eredu eraginkor eta moderno baterako bidea markatzen ari dira”.
Abian jarri zenetik, sustapen ekonomikoaren arloaak emaitza nabarmenak lortu ditu, eta udalerria erreferente bihurtu du berrikuntzan eta erakundeen arteko lankidetzan. 2016az geroztik, garapen ekonomikoko proiektuetan 6 milioi euro baino gehiagoko inbertsioa egin da; besteak beste, Hiri Ekonomiaren Plan Integrala eta “Zumarragako Azoka” marka sortu dira.
Ekitaldia amaitzeko, proiektuaren jarduerekin zerikusia duten udalerriko puntu estrategikoetan zehar ibilbidea egin zen.
