2025·07·18
ZUMARRAGAK EUROPAKO INDUSTRIA JASANGARRIAREN MAPAN LEKU NABARMENA HARTU DU
Arcelor zaharreko lursailean kokatuko den metal kritikoen berreskurapenerako planta 2026ko hasieran jarriko da martxan, eta industria-garapenerako eredu jasangarri baten adierazle bihurtu da, erakundeen arteko lankidetzari esker.
Zumarragako garapen industrial berriak aurrerapauso garrantzitsua eman du Bidasoa Metal 78 enpresaren obren aurrerapenarekin. Estatuko lehen planta izango da platinoa, paladioa eta rodioa bezalako metal kritiko preziatuak berreskuratzeko %100 prozesu hidrometalurgikoak erabiliko dituena. Planta 2026ko hasieran martxan egotea aurreikusten da.
Uztailaren 17an egindako bisita instituzionalak baieztatu du lanak aurreikusitako erritmoan doazela. Azpiegitura nagusiaren lanak azaroan amaituko dira, eta ondoren, proiektuaren %70 osatzen duten ekipamendu teknologikoen instalazioa hasiko da. Proiektuaren guztizko inbertsioa 12 milioi eurokoa da, eta horietatik 5 milioi Next Generation Europako funtsetatik datoz.
Instalazioetara egindako bisitan, Zumarragako alkate Mikel Serranok nabarmendu du ekimen honen eraldaketa-potentziala:
“2016an Arcelor itxi zenetik erronka honi ekin diogu intentsitatez eta etengabe. Gaur egun, erakundeen arteko lankidetzari eta Next Generation Europako funtsei esker, benetako errealitate bihurtzen hasi da. Zumarragak etorkizunari berriz ere begiratzen dio, berrikuntzan eta jasangarritasunean oinarritutako industria-eredu baten bidez.”
6.000 metro koadro baino gehiagoko pabiloia dagoeneko Metal 78 enpresaren eskura dago, eta uztailean bertan hasiko dira suteen aurkako babes-neurrietarako lanak. Guztira, 40 lanpostu sortzea aurreikusten da, eta dagoeneko lehen 7 langileak kontratatu dira.
Alkateaz gain, bisitan izan ziren Espainiako Gobernuko Ekonomia Zirkularreko Batzordeburua, Alejandro Dorado; Gipuzkoako Jasangarritasuneko diputatu José Ignacio Asensio; Eusko Jaurlaritzako Ingurumeneko sailburuordea, Josu Bilbao; Ekonomiako sailburuordea, Iñaki Ruiz, eta Euskadiko Gobernu Ordezko Marisol Garmendia, besteak beste. Guztiek azpimarratu zuten planta hau estrategikoa dela, eta Europako industria-autonomia indartzeko ekarpen garrantzitsua egiten duela.
Metal 78 proiektua Arcelor zaharreko eremuan egiten ari den berroneratze integralaren parte da. Eusko Jaurlaritzak gidatzen du, SPRILUR-en bidez, eta guztira 25 milioi euroko inbertsioa egingo da. Horren barruan sartzen dira lursailen erosketa, deskontaminazio-lanak, ingurumen-berroneratzea, eraikinen eraisketa, pabilioi berrien eraikuntza eta urbanizazio-lanak.
Gainera, herritarrentzat onuragarriak izango diren jarduerak ere aurreikusi dira, hala nola poligono industrialerako sarbide berria, trafiko astuna eremu bizilekutik urrunduko duena, eta Urola ibaiaren zati bat berreskuratzea.
Industria-berrikuntzaren adibide argi bat den proiektu honek Zumarraga berriro ere Gipuzkoako industria-sarearen parte aktibo bihurtzen du. Metal 78 ez da enpresa bat bakarrik: etapa berri baten hasiera da, non jasangarritasuna eta etorkizunerako aukerak uztartzen diren XXI. mendeko erronkei aurre egiteko.