2026·07·09
Zumarragako Udalak eta Gipuzkoako Foru Aldundiak atzo bilera egin zuten herriko garraio publikoaren egoera aztertzeko eta Zumarragaren autobus bidezko loturak hobetzeko aukerak lantzen jarraitzeko.
Bileran, Mikel Serrano alkateak eta Azahara Domínguez Mugikortasun, Turismo eta Lurralde Antolaketako diputatuak hainbat lehentasun partekatu zituzten. Horien artean daude Debagoieneko Mondragon Unibertsitateko campusera joateko autobus zerbitzua hobetzea eta Loiuko aireportuarekin dauden loturak indartzea, Urola Garaiko herritarren eguneroko mugikortasun beharrei erantzun hobea emateko.
Bi erakundeek adostu zuten datozen asteetan hobekuntza aukera desberdinak aztertzen jarraitzea, helburua izanik hurrengo ikasturtea hasi aurretik Lurraldebusen zerbitzuan neurri berriak ezartzeko aukera baloratzea.
Bestalde, Gipuzkoako Foru Aldundiak Zumarragan Lurraldebusen indarkeria sexisten aurkako protokoloa ezagutarazteko kanpaina bat garatzeko konpromisoa hartu zuen. Ekimen horren bidez, herritarrek garraio publikoan segurtasuna eta prebentzioa indartzeko ezarritako neurriak ezagutu ahal izango dituzte.
Zumarragako Udalak positibotzat jo zuen bilera, eta herritarren mugikortasuna hobetzen lagunduko duten neurriak sustatzen jarraituko du, erakundeen arteko lankidetza indartuz. Bi aldeek uda ondoren berriro elkartzea adostu zuten, egindako lanaren jarraipena egiteko eta aztertutako proposamenen bilakaera baloratzeko.