2026·04·13
Zumarragako Beloki pilotalekua berriro ere lehen mailako kirol ekitaldi baten agertoki bihurtu zen atzo, Euskal Pilota Egokitua Zirkuituaren barruan jokatu zen Gipuzkoako Irekiko finalekin. Kirol emaitzetatik harago, jardunaldiak agerian utzi du Zumarragak inklusioarekin, aukera berdintasunarekin eta kirolaren bidezko balioen sustapenarekin duen konpromiso irmoa.
Lehen aldiz, hiru final jokatu ziren jardunaldi berean, 2018an hasitako ibilbideak izan duen hazkundearen isla argia. Adimen urritasuneko hastapen mailako kategoria berria gehitzeak erakusten du gero eta pertsona gehiagok aurkitzen dutela pilotan parte hartzeko, garatzeko eta elkarrekin bizitzeko espazio bat.
Beloki pilotalekuan bizitako giroa bikaina izan zen, zaleen erantzun onarekin eta pilotarekiko herri baten arraigoa berriro agerian utziz. Zumarragak beste behin erakutsi du maila handiko ekitaldiak hartzeko duen gaitasuna, hurbiltasunez eta komunitatearen indarraz, kirolaz harago doazen balioak lehenetsiz.
Kirol mailari dagokionez, partida ikusgarriak eta emozio handiko uneak bizi izan ziren kategoria guztietan. Adimen urritasuneko hastapen mailan, Unai Dios eta Daniel Calviño izan ziren txapeldunak, Joel Garcia eta Tanya Fernandez gaindituta. Maila nagusian, Lander Ortega eta Eneko Sagarmendik eskuratu zuten garaipena partida lehiatu batean. Gurpildun aulkiko finalean, berriz, jardunaldiko une zirraragarrienetako bat bizi izan zen, Aingeru Senperena eta Beñat Lizasoren garaipen estuarekin (25-21).
Emaitzetatik harago, finalistek erakutsitako kiroltasuna nabarmendu behar da, errespetua, ahalegina eta gainditzeko gaitasuna bezalako balioak lehen lerroan jarriz. Kirolaren benetako zentzua islatu zuen irudia utzi zuten guztiek.
Gainera, ETB-1 bidez eta plataforma digitalen bitartez egindako zuzeneko emanaldiek Zumarragaren izena milaka etxetara eraman zuten, herria kirol inklusiboaren sustapenean erreferente gisa kokatuz.
IKUSI
Ekitaldi honek 2019an Emakume Master Cupeko finalekin bizitako arrakastari jarraipena eman dio, Zumarraga pilotaren egutegian plaza garrantzitsu gisa sendotuz, eta kirola komunitatetik eta balioetatik bizitzeko espazio gisa indartuz.
Jardunaldiari amaiera emateko, sari banaketa egin zen, eta bertan parte hartu zuen Arantxa González Berdintasun eta Gizarte Zerbitzuetako zinegotziak, udalaren konpromisoa berretsiz kirol inklusiboaren eta aukera berdintasunaren alde.
Zumarragako Udalak oso balorazio positiboa egiten du jardunaldiaren garapenaz, eta eskerrak eman nahi dizkie bai antolatzaileei, bai kirolariei eta baita herritarrei ere emandako erantzunagatik. Zumarragak aurrera egiten jarraitzen du herri inklusibo baten eraikuntzan, non kirola pertsona guztien zerbitzura dagoen tresna den.