2026·07·17
Zumarragako Ospitale inguruan aparkatuta zegoen ibilgailu baten motorretik erreskatatutako katu gazte bat behin betiko familia baten bila dabil.
Katu maitagarri eta lagunkoia hainbat egunez egon zen inguruan, zenbait pertsonaren inplikazioari esker erreskatatu ahal izan zuten arte. Gaur egun, herriko bizilagun batek hartu du aldi baterako.
Adopzioa errazteko eta animaliaren ongizatea bermatzeko, desparasitatuta eta mikrotxiparekin identifikatuta emango da, pertsona adoptatzailearen izenean. Gainera, katuak sei hilabete betetzen dituenean, Zumarragako Udalak bere gain hartuko du esterilizazioaren kostu osoa.
Katu hau adoptatzeko interesa duten pertsonek Laukatu Elkartearekin jar daitezke harremanetan, laukatuelkartea@gmail.com helbide elektronikora idatzita.
Erreskate hau Zumarragako Udalak eta boluntario taldeak udalerriko katu-koloniak modu arduratsuan kudeatzeko egiten duten lanaren barruan kokatzen da. Lan horren lehen urtean, 19 katuk behin betiko etxea aurkitu dute adopzioen bidez. Horrez gain, 50 katu esterilizatu dira AEA metodoaren bidez —Atzematea, Esterilizazioa eta Askatzea—: 28 eme eta 22 ar.
Metodo horrek katuen populazioa modu etikoan kontrolatzea, animalien ongizatea hobetzea eta kontrolik gabeko ugalketaren ondoriozko arazoak pixkanaka murriztea ahalbidetzen du.
Zumarragako Udalak, gainera, erroldatutako kolonietako animalien elikadura egokia eta kontrolatua bermatzeko pentsuaren erosketa bere gain hartzen du.
Udalak eskerrak eman nahi dizkie kolonien elikaduran, zaintzan eta jarraipenean parte hartzen duten boluntarioei. Era berean, animalien ongizatearekin sentsibilizatuta dauden herritarrak lan horretan parte hartzera animatu nahi ditu.
Boluntario gisa lagundu nahi duten pertsonek Zumarragako Udalera jo dezakete edo laukatuelkartea@gmail.com helbidera idatzi.
Bestalde, norbaitek udalerrian kontrolatu gabeko katu-kolonia edo katu talde bat aurkitzen badu, garrantzitsua da Udalari horren berri ematea. Horrela, egoera aztertu eta dagokion jarduera-protokoloa abiarazi ahal izango da.
Herritarren laguntzarekin, Zumarragak animalien ongizatea errespetatuko duen bizikidetza arduratsuago baten alde egiten jarraitzen du.