ZUMARRAGAK UDALERRIKO BIZIGABEKO ETXEBIZITZEN AZTERKETA AURKEZTU DU, ETXEBIZITZA-BEHARREI AURRE EGITEKO
2025·07·06
ZUMARRAGAK UDALERRIKO BIZIGABEKO ETXEBIZITZEN AZTERKETA AURKEZTU DU, ETXEBIZITZA-BEHARREI AURRE EGITEKO
Azterketak 139 etxebizitza huts identifikatu ditu, Zumarragako alokairu-eskariari erantzuteko potentzial handiko baliabide gisa.
Gaur goizean aurkeztu da Zumarragan udalerriko Bizigabeko etxebizitzen azterketa, Udalak bultzatutako lana, etxebizitza-parkearen egoera zehatz-mehatz ezagutzeko eta etxebizitza-politiketan oinarritutako erabakiak hartzeko helburuz.
Ekitaldian Mikel Serrano Zumarragako alkatea eta Alba Pascual, Zumarragako Udaleko etxebizitza-teknikaria, izan dira. Azken honek eman ditu xehetasunak azterketaren emaitzei eta ondorioei buruz.
Alkateak adierazi duenez, lan honek helburu bikoitza du: “alde batetik, datu errealetan oinarrituta jakin nahi dugu zenbat etxebizitza dauden benetan hutsik eta zein ezaugarri dituzten; eta bestetik, informazio hori behar dugu Zumarragan gero eta handiagoa den etxebizitza-beharrari, bereziki alokairuari dagokionez, erantzuna ematen jarraitzeko”.
Azterketaren arabera, Zumarragan 139 etxebizitza identifikatu dira bizigabe gisa, hau da, bi urtez etengabe hutsik egon direnak eta 149/2021 Dekretuan ezarritako irizpide guztiak betetzen dituztenak. Etxebizitza hutsen ehunekoa (%2,9) Gipuzkoako (%3,7) eta Euskadiko (%4,4) batez bestekoaren azpitik egon arren, txostenak azpimarratzen du etxebizitza horiek aukera handia direla udalerriko etxebizitza-merkatuaren oreka lortzeko.
Azterketak erakusten du gehienak hirigune historikoan daudela eta batez besteko adina 61,4 urtekoa dutela, beraz, birgaitze-behar handia dute. Bestalde, eraikinen %52k ez du igogailurik, irisgarritasun unibertsalerako oztopo garrantzitsua dena.
Txostenak etxebizitza-eskatzaileen profila ere aztertu du. Gaur egun, 358 pertsona daude izena emanda Zumarragan etxebizitza eskuratzeko, eta horietatik %82 alokairua bilatzen ari dira. Datu horrek kontraste nabarmena erakusten du udalerriko parkearekin, non etxebizitzen %87 jabetzakoak diren.
Udalaren iritziz, diagnostiko hau funtsezkoa da datozen urratsak definitzeko. Hurrengo jarduketen artean, hutsik dauden etxebizitzen jabeekin harremanetan jartzea aurreikusten da, desokupazioaren arrazoiak ezagutzeko eta etxebizitza horiek programa publikoen bidez merkaturatzeko aukerak aztertzeko.
Lan honen bidez, Zumarragak etxebizitza duina izateko eskubidearekin duen konpromisoan sakontzen jarraitzen du. Izan ere, etxebizitza-parkearen kudeaketa soziala eta arduratsua ere bada udalerriaren kohesioa, aniztasuna eta etorkizuna zaintzeko modu bat.