2025·08·04
ZUMARRAGAKO UDALAK BABES BEREZIA EMAN NAHI DU ETXEBIZITZA PUBLIKO ETA IRISGARRIAREN ALDE
Faustino Orbegozo eta Forjas auzoetan egingo diren etxebizitza berriak udalerriarentzat aurrerapauso garrantzitsua dira
Zumarragako Udalarentzat albiste pozgarria da datozen urteetan gure herrian egingo diren hiru etxebizitza-promozioen baieztapena. Eusko Jaurlaritzarekin elkarlanean, udalak urrats sendoa eman du herritar guztientzako irisgarriak eta kalitatezkoak izango diren etxebizitzak sustatzeko.
Alde batetik, aurten bertan, urrian, Antzina Hiribidean (Eitzaga Berri) eraikitako 108 etxebizitzak esleituko dira. Bestetik, datozen urteetan bi proiektu estrategiko berri martxan jarriko dira: Faustino Orbegozo auzoan 24 bizitegi lagundu eraikiko dira eta Forjas gunean, Kalebarren aldean, 44 babes ofizialeko etxebizitza alokairurako. Bi proiektu hauek hurrenez hurren 2026an eta 2027an hastea aurreikusten da.
Zumarragatik begiratuta: zer suposatzen du honek guretzat?
- Benetako erantzunak, benetako beharrei. 2025eko bigarren hiruhilekoan, Zumarragan erroldatutako 276 pertsonak etxebizitza-eskaera egin dute Etxebiden, gehien-gehienak (232) alokairuaren aldekoak.
- Erakundeen arteko lankidetza eraginkorra. Zumarragako Udalak doan lagatako Faustino Orbegozo inguruko lurzoruak erakusten du tokiko erakundearen konpromisoa etxebizitza publikoaren aldeko politikekin.
- Gazteen emantzipazioari bultzada. Mikel Serrano alkateak azpimarratu duenez, “proiektu hauek gazteei Zumarragan bizitzeko aukerak eskaintzen dizkiete, euren bizi-proiektua gure herrian garatu ahal izateko aukera emanez”.
- Irisgarritasuna eta jasangarritasuna hobetzeko inbertsioak. Faustino Orbegozo ingurua urbanizatuko da eta Forjas auzoan ere espazio degradatuak biziberrituko dira, ingurunea atseginago eta eskuragarriago bihurtuz.
Proiektuen xehetasunak
|
Gunea |
Etxebizitzak |
Ezaugarri nagusiak |
Aurreikusitako inbertsioa |
|
Antzina Hiribidea (Eitzaga Berri) |
72 babes ofizial + 36 gizarte-etxebizitza |
Urrian emango dira, guztiz irisgarriak, energia-eraginkortasun handiena, lurpeko garajeak |
~14,6 M € (EBko funtsak: %31,8) |
|
Faustino Orbegozo |
24 bizitegi lagundu |
20 logela bakarrekoak, 4 bikotekoak (bat mugikortasun urrikoentzat egokitua), 24 garaje eta udal erabilerarako lokala |
~4,94 M € + 1,2 M € urbanizazioa |
|
Forjas (Kalebarren) |
44 babes ofizialeko etxebizitza |
Lurzoru industrial eraldatuan, eraikuntza 2027an hastea aurreikusia |
~8 M € |
Herritarrengan izango duen eragina
- Bizitzeko egonkortasuna eta herrian sustraitzea. Prezio eskuragarrietan alokairua eskuratu ahal izateak familien eta gazteen bizi-proiektuei eusteko aukera emango die.
- Gazteen presentzia aktiboa. Zumarragako gazteek ez dute euren herria utzi beharko bizitoki duin baten bila.
- Herri kohesionatuago eta inklusiboagoa. Faustino Orbegozo inguruan bizitegi lagunduak eta udal lokal komunitarioa izango dira, zerbitzu sozial eta komunitarioen garapena ahalbidetuz.
- Ingurune urbanoaren biziberritzea. Etxebizitzen eraikuntzarekin batera, irisgarritasuna hobetuko da eta hiri-antolaketa hobetzeko lanak egingo dira.
Zumarragako Udaletik etxebizitza publikoaren aldeko politika sendoa bultzatzen jarraitzen dugu, gure herritarren behar eta errealitate anitzak kontuan hartuta: gazteak, errenta baxuko pertsonak, familiak edo trantsizio-unean dauden bizilagunak. Etxebizitza duina eskubidea da, eta Zumarragan eskubide hori bermatzeko lanean jarraituko dugu.
Herritarrentzat aukera berriak sortzeko bidean, etxebizitza horien informazioa argi eta gardentasunez kudeatuko dugu eta adjudikazio-prozesuak modu bidezkoan egingo direla bermatuko dugu. Zumarragan bizi nahi duten guztiek izan dezatela euren bizitza hemen egiteko aukera.