ZUMARRAGAKO UDALAK IZEN-EMATE EPEA BERRIA IREKIKO DU LAUROGEI URTEKO PERTSONEN EGUNEAN PARTE HARTZEKO
2026·08·29
Zumarragako Udalak bigarren urtez jarraian antolatuko du Laurogei Urteko Pertsonen Eguna, 80 urte edo gehiago dituzten udalerriko bizilagunei aitortza eta omenaldia egiteko helburuz. Ekimenaren bidez, haien bizi-ibilbidea, esperientzia eta Zumarragako komunitateari egindako ekarpena balioan jarri nahi dira.
Jardunaldia irailaren 24an egingo da, 14:00etan, Zumarragako Azokako arkupetan. Horretarako, programa berezi bat prestatu da, herriko adineko pertsonen arteko topaketa, elkarbizitza eta aintzatespena sustatzeko.
Izen-emate epea eten egin zen oporraldia zela eta. Ohiko jarduerari berriro ekinda, Zumarragako Udalak izen-ematea berriz irekiko du, interesa duten pertsona guztiek topaketa eta aintzatespen jardunaldi honetan parte hartzeko aukera izan dezaten.
Interesa duten pertsonek irailaren 1etik 15era bitartean eman ahal izango dute izena, 11:00etatik 12:30era, Gure-Txoko Zentroko hirugarren solairuan. Izen-ematea formalizatzeko, 15 euroko ordainketa egin beharko da pertsonako.
Zumarragako Udalak ekimen honen hartzaile diren pertsona guztiak animatu nahi ditu egun berezi honetan parte hartzera. Jardunaldiaren helburua da harreman sozialak indartzea, elkarbizitza sustatzea eta adineko pertsonek Zumarragako bizitzan duten funtsezko zeregina aitortzea, haien esperientzia eta ibilbidea herriaren memoria eta nortasunaren ezinbesteko parte direlako.