2026·06·01
Zumarragako Udalak azken urteotan udal brigada indartzeko apustu sendoa egin du, herriko mantentze eta zerbitzu beharrei gero eta eraginkortasun handiagoz erantzuteko helburuarekin.
Indartze horren barruan kokatzen dira Lanbiderekin eta Eusko Jaurlaritzarekin elkarlanean garatutako enplegu eta prestakuntza programak. Programa horien bidez, langabezian dauden pertsonek prestakuntza jasotzen dute eta ondoren udal brigadan lan egiteko aukera dute, beren laneratzea errazteko.
2022 urtetik hona 32 pertsonak parte hartu dute programa hauetan, eta horietatik 14k lan merkatuan sartzea lortu dute ondoren. Gainera, aurreko edizioko lau parte-hartzailek udal brigadaren errefortzu gisa lanean jarraitu zuten. Azken edizioan, zortzi pertsonak igeltseritza, margoketa eta lan-arriskuen prebentzioari buruzko prestakuntza jaso dute, eta gaur egun brigadarekin batera ari dira lanean.
Bestalde, Udalak bi lehen mailako ofizial ere kontratatu ditu brigadaren egitura sendotzeko. Horri esker, brigadak antolaketa gaitasun handiagoa du gaur egun, hainbat lan-taldetan banatu baitaiteke mantentze lanak, azpiegitura beharrak eta udal ekitaldietarako muntaketak aldi berean garatzeko.
Udal brigadaren lana funtsezkoa da herritarren egunerokoan. Bere eginkizunen artean daude udal instalazioen mantentzea, obra txikiak eta konponketak, margoketa eta igeltseritza lanak, hiri altzarien mantentzea, seinaleztapena, espazio publikoen egokitzapena eta udal azpiegituren kudeaketa.
Horrez gain, udaleko kultur eta kirol jardueren antolaketan ere zeregin garrantzitsua betetzen du. Otsaila eta azarora bitartean, ia astero edo astebururo kultur eta kirol ekitaldi ugari egiten dira Zumarragako gune, auzo eta espazio ezberdinetan, eta brigadak horiek guztiak gauzatzeko beharrezkoak diren muntaketa, desmuntaketa eta garraio lanak koordinatzen ditu.
Eszenatokiak, karpak, toldoak, mahaiak, aulkiak, kasetak eta bestelako azpiegiturak prestatzen dituzte urte osoan zehar. Udal karpak, gainera, erabilera anitza eskaintzen du herriko hainbat gunetan, babes klimatiko eta estalitako espazio gisa. Zeregin hori Azokako guneak osatzen du, herriak urte osoan zehar erabil ditzakeen estalitako espazio publikoen eskaintza indartuz.
Obra eta Zerbitzuen arloan, gainera, udal brigadaren lana beste zerbitzu batzuekin osatzen da. Lorezaintza lanak Ikerlorarekin koordinatzen dira, kale garbiketa FCC enpresaren esku dago eta udal teknikari elektrikari batek instalazio elektrikoen mantentzea egiten du.
Mantentze lan horien guztien kudeaketa errazteko, Udalak Línea Verde plataforma erabiltzen du. Tresna horren bidez, brigadak, Udaltzaingoak eta udal teknikariek antzemandako gorabeherak erregistratu, antolatu eta jarraipena egiten dituzte.
Azken finean, brigadaren lana ez da jarduketa handi bakar batean neurtzen. Herriaren eguneroko funtzionamendu egokia bermatzen duten ehunka mantentze, konponketa eta hobekuntza txikik osatzen dute bere jarduna. Kaleetan, auzoetan, industrialdeetan, udal eraikinetan zein landa bideetan egiten diren lan horiek guztiek herritarren bizi kalitatean eragin zuzena dute.
Azken hilabeteetan egindako edo aurreikusitako jardueren artean daude, besteak beste, galtzadetako konponketak, hiri altzarien mantentzea, oinezkoen pasabideen eta seinale horizontalen berritzea, baranden eta kale elementuen konponketak edota landa bideen mantentze lanak.