2026·02·06
Zumarragako alkateak, Mikel Serranok, gaur aurkeztu du Zuekin Azoka bonuen zazpigarren edizioa, Zumarragako Azokan kontsumoa sustatzeko eta tokiko merkatuaren jarduera ekonomikoa babesteko Udalak bultzatutako ekimen bat.
Kanpainari esker, herritarrek 20 euroko balioa duten bonuak 10 euroren truke eskuratu ahal izango dituzte, aldea Zumarragako Udalak bere gain hartuta. Bonuak 5 euroko lau tiketetan banatuta egongo dira, atxikitako postuetan erabiltzea errazteko helburuarekin.
Edizio honetan, Zumarragako Udalak 8.000 euro bideratuko ditu kanpainara; herritarren ekarpenarekin batera, horrek guztira 16.000 euroko mugimendu ekonomikoa sortzea ahalbidetuko du Zumarragako Azokan.
Pertsona bakoitzak bonu bakarra eskuratu ahal izango du, eta baldintza bakarra adin nagusikoa izatea eta erosketa unean NANa edo AIZa aurkeztea izango da.
2020tik sendotutako ekimena
Zuekin Azoka bonuen kanpaina 2020an jarri zen martxan pandemiaren ondorioz, Azoka indartzeko eta, salbuespenezko egoeraren aurrean, bertan erosketak sustatzeko neurri gisa. Ordutik herritarren harrera oso ona izan du, asteko merkatuan kontsumoa sustatzeko tresna eraginkor gisa sendotuz.
Zazpigarren edizio honekin, Zumarragako Udalak 56.000 euro bideratu ditu guztira Zuekin Azoka bonuen kanpainetara, 5.600 bonu jaulkiz eta 120.000 eurotik gorako inpaktu ekonomikoa sortuz Azokako postuetan.
Ekintza hau Zumarragako Azoka eta, oro har, lehen sektorea dinamizatzeko eta balioesteko estrategia zabalago baten parte da. Helburua ez da Azokan salmentak sustatzea bakarrik, Azoka posible egiten duen guztiaren jarraipena bermatzea ere bada, bertako ekoizleak baitira euren produktuak zuzenean saltzen dituztenak. Eredu jasangarri honek, 0 kilometroko eta kalitate goreneko produktuetan oinarrituak, ekoizleen eta kontsumitzen dutenen arteko lotura indartzen du, Zumarragarentzat funtsezkoa den tradizioaren iraupena ziurtatuz.
Baina Azoka ez da erosteko eta saltzeko gune bat bakarrik, baizik eta elkargune bizi eta askotariko bat da, non herritarrak bildu, aitortu eta partekatu egiten diren. Betidanik, belaunaldiek, kulturek eta esperientziek bat egiten duten lekua izan da, Zumarragaren nortasunaren isla bilakatuz. Hemen bizilagunek komunitatea indartzen dute, herria eginez eta tokiko merkataritzarekin eta lehen sektorearekin lotura berezia sortuz.
Horrela, Zumarragako Udalak berretsi egiten du tokiko merkataritza indartzeko, hurbileko ekonomia sustatzeko eta Azoka Zumarragako erreferentziazko gune sozial eta ekonomiko gisa mantentzeko duen konpromisoa.