Eduki publikatzailea

Atzealdea ZUMARRAGAKO UDALAK ZUGAZTE INSTAGRAMEKO PROFIL BERRIA SORTU DU ETA PROZESU PARTE-HARTZAILE BATI EKIN DIO GAZTEEKIN ETA GAZTEENTZAT

Zumarragako Udalak ZUGAZTE Instagrameko profil berria jarri du martxan, udalerriko gazteentzat bereziki sortutako gune digitala. Kanal honen bidez, gazteek jarduera, ekitaldi, prestakuntza, kultura, kirol eta beste gai interesgarri batzuen berri izango dute, eta kolektibo horrentzako topagune birtuala bilakatuko da.

2025·01·24

ZUGAZTE profilak Udalaren eta gazteen arteko komunikazio-lotura izan nahi du, informazio garrantzitsu guztia eskuratu eta herrian egiten diren planak eta jarduerak ezagutu ahal izateko. Gazteak zein herriko elkarteak gonbidatuta daude kontua jarraitzera eta gazteen parte-hartzea dinamizatzea helburu duen plataforma digital berri honetan parte hartzera.

2024-2027 Gazteria Planerako prozesu parte-hartzailea

Ekimen hau 2024-2027 Gazte Planaren garapenaren barruan kokatzen da, Zumarragako gazteei zuzendutako udal jarduerak hurrengo urteetan planifikatu eta ordenatzen dituen tresna estrategikoa. Planaren helburu nagusia da gazteek dituzten erronkei aurre egitea, aurretiazko diagnostiko baten bidez identifikatuta, eta agenda estrategiko bat ezartzea, emantzipazioa, gizarteratzea, parte-hartzea eta gazteen ongizatea lehenetsiko dituena.

Plan horren esparruan, 2025ean ekintza parte-hartzaileak egingo dira. Guztira, 720 gutun bidali dizkie Udalak 1995 eta 2007 urteen artean jaiotako gazteei, Zumarragako Gazte Asanbladako kide izateko gonbita luzatuz. Asanblada honetan, herriko 18 gaztek osatutako talde batek hiru saiotan parte hartzeko aukera izango du, non Zumarragako gazteen ongizatea eta bizi kalitatea hobetzeko proposamenak egin ahal izango dituzten.


 

Parte hartu nahi duten gazteek otsailaren 5a baino lehen eman dezakete izena, 670012258 telefonora deituz edo WhatsApp bat bidaliz, edo esteka honen bidez: https://labur.eus/SLSlK

Gazteria Bulegoa

Udalak gogorarazi du Zelai Arizti Kultur Etxeko beheko solairuan dagoen Gazteria Bulegoa goizeko ordutegian dagoela eskuragarri, 9:30etik 13:30era. Horrez gain, hitzorduak hitzartu daitezke 943723510 telefonora deituta, kontsultak egiteko edo eskura dauden baliabide eta jarduerei buruzko informazio gehiago jasotzeko.

Ekintza hauekin, Zumarragako Udalak gazteriarekin duen konpromisoa berresten du, udal bizitzan parte-hartze aktiboa eta ongizatea sustatuz, bere beharretara egokitutako politika publikoen bidez.